Kalaallit Nunaata nunap immikkoortuinut kommuneqarfinnullu aggorneqarnera pillugu Inatsisartut inatsisaata allanngortinneqarneranik Inatsisartut inatsisaat nr. 6, 11. november 2000-imeersoq.
§ 1.
Kalaallit Nunaata nunap immikkoortuinut kommuneqarfinnullu aggorneqarnera pillugu Inatsisartut inatsisaanni nr. 11 30. oktober 1998-imeersumi imatut allannguisoqarpoq:
1. § 2-imi nr. 7-imi aamma 8-imi ", taamaattoq tak. § 4"atorunnaarpoq.
2. § 5 atorunnaarpoq.
§ 2.
Inatsisartut inatsisaat 1. januar 2001 atulerpoq.
Imm. 2. Aningaasarsianit akileraarutit pillugit Inatsisartut inatsisaannut tunngatillugu § 1-imi aalajangersagaq aatsaat ukioq aningaasarsiorfiusoq 2002 aallarnerfigalugu atuutilissaaq.
§ 3.
Kangerlussuaq pillugu inatsisit tunngavigalugit allaffissornikkut ingerlatsineq kommunit aggornerisa avataaniittut pillugit inatsisit naapertorlugit 2001-ip naanissaata tungaanut Naalakkersuisunit isumagineqassaaq. Tamatuma aningaasalersorneqarnera manna tikillugu periuseq naapertorlugu ukiup 2001-ip naanissaata tungaanut Nunatta karsianit isumagineqassaaq. Tamatuma kingorna Kangerlussuaq pillugu allaffissornikkut ingerlatsineq aamma aningaasalersuineq Sisimiut kommuniani nunaqarfittut Sisimiut Kommunianit isumagineqalissaaq.
Imm. 2. Kangerlussuarmi nunaqqatigiit siunnersuisoqatigiivi 30. april 2001 tikillugu atuutissapput Nunattalu karsianit aningaasalersorneqarlutik.
Imm. 3. Ikaarsaarfiup nalaani 2001-imi 1. januarimiit 31. decemberip tungaanut Naalakkersuisut suliat Kangerlussuarmut tunngasut kommunit aggornerisa avataaniittut pillugit inatsisit naapertorlugit Sisimiut Kommunianut piginnaatitsissuteqarnikkut isumagisassanngortissinnaavaat kommunip taamaaliornermut aningaasartuutai akilerlugit.
Namminersornerullutik Oqartussat, ulloq 11. november 2000
Jonathan Motzfeldt/
Søren Hald-Møller
Isumaliutissiissut (Aappassaaneerinninneq)